De Hoornseplas is elke waarme zummer weer n begrip ien Stad. t Bekende duo Pé en Rinus zingn’ der ok nog ains n prachteg laid over. Gelukkeg is der veur elknain dei van fietsen en van Grunneger toal holdt ok wat te zain: De Zunneriepe.

Hailendal an de zuudkaant van de Stad, laangs t Hoornsemeer, lopt n fietspad mit n mooie noam “Zunneriepe” . Het is n onverwachte Grunneger noam, dit ligt in t verlengde van de Olaf Palmelaan en noast de Dag Hammarskoldstraat. N Riep(e) is n aander woord veur stoep; t voutpad noast de grote weg om op te loopn. De dakloznkraant ien Stad hait doarom “ De Riepe”. Ien t dikke woordnbouk van Ter Laan stait vot achter t woord ‘riep(e)’ de verwiezing noar ‘Glinne riepe’, de stoep op de Vismaarkt ien Stad. Want hier is de riep geregeld waarm van de zunne en dus is t aileks ok n “ Zunneriepe”.

Woordnboukman Helmer Molema (1822-1897) keek aaltied noar verwantschap en hai zag dat ‘Riep(e)’ ok ien Drente en Overiessel bruukt wordt, t is n raand, voak n oever. Ien n dörps- of stadsnoam komm wie t doarom ok geregeld teegn: ien Noord-Holland ligt vlakbie Alkmaar t dörp De Rijp, ien Oost-Friesland (Duutsland) ligt vlakbie Emden t plak Riepe en ien Zuud-Denemarken ligt n stadje dat hait: Ribe.

T vaalt op dat ze aalmoal vlak an t wotter liggn of derbie leegn hemmen. Zuks geldt ok veur t Grunneger dörp Riep (Zeeriep/Zeerijp). Hier is ientussn ok t wotter verder vot. Molema nuimt ien zien woordnbouk t latiense woord veur raand en doarmit wordt veul duudlek: ‘ Ripa’

Naar: Toalproat, Tonko Ufkes (Dagblad van het Noorden, 7 oktober 2014)